Futbollisti malazez i Teutës, Darko Nikaç, ishte një nga të mbijetuarit në Durrës, pas tërmetit që goditi Shqipërinë. Sulmuesi aktualisht ndodhet në Podgoricë, teksa u largua menjëherë pas ngjarjes për në vendlindjen e tij.
Gjatë një rrëfimi për median malazeze “Dvevne”, ai ka zbuluar tmerrin që përjetoi bashkë me familjen e tij.
“Tërmeti i parë u ndje rreth orës 02.00, pas mesnate. Nuk ishte i tmerrshëm, kështu që u ktheva për të fjetur. Por, ai i orës 4 pa dyshim që ishte. Nuk e dija në fillim se çfarë po ndodhte. Ishte një katastrofë e vërtetë. Imagjinoni të zgjohesh dhe gjithçka rreth teje dridhet dhe bie në tokë dhe më e rënda ishte që kisha pranë gruan dhe foshnjën. Me pak fjalë, mund të them që ishte një situatë e pashpresë”.
“Unë u përpoqa të hapja derën, por u bllokua. Kështu që, doja ta thyeja, por nuk ia dola. Prita pak dhe sapo munda, menjëherë dola nga banesa dhe qëndruam jashtë. Morëm vetëm ushqim për fëmijën dhe kaq”.
“Pashë një hotel përtej rrugës që kishte rënë në tokë. Qëndruam në një fushë të hapur dhe prita që situata të qetësohej. Unë isha akoma i tronditur, por gruaja ime arriti ta merrte çelësin e apartamentit për t’u nisur menjëherë për në Podgoricë. Kam biseduar me trajnerin dhe ai më tha të shkoja në shtëpi për 2-3 ditë”.
“Tërmeti i dytë i orës 07:00, rrëzoi gjithçka, kështu që unë isha me fat. Është e pamundur ta përshkruaj se si ishte. Ishte si një film. Pas tërmetit të dytë, dy nga tri ndërtesat pranë meje u shkatërruan dhe u rrënuan. Ishte gjëja më e frikshme që kam parë në jetën time. Ndihesha plotësisht i pafuqishëm, nuk dija çfarë do të më ndodhte”.
