Një tragjedi natyrore goditi Shqipërinë mëngjesin e 26 nëntorit. Tërmeti me magnitudë 6.4 të shkallës Rihter mori 49 jetë njerëzish dhe la qindra të plagosur, si dhe një pamje dramatike në Durrës e Thumanë, me një sërë ndërtesash të kthyera në gërmadha.
Sot është mëngjesi i katërt pas tragjedisë dhe shqiptarët vijojnë të jenë në panik, pasi lëkundjet e tokës vazhdojnë, disa prej të cilave të forta. Me qindra banorë vijojnë të qëndrojnë në çadra, pasi shtëpitë e tyre janë shkatërruar nga tërmeti, ndërsa Shqipëria i kaloi festat e Pavarësisë dhe të Çlirimit në zi Kombëtare dhe gjendje të jashtëzakonshme.
Pasi tërmeti i fuqishëm i të martës goditi Shqipërinë, shumë vullnetarë, biznesmenë, organizata dhe individë nga mbarë trojet shqiptare e diaspora, kanë kontribuar me ushqime, batanije, çadra dhe ndihma monetare për të prekurit nga tërmeti.
Përveç shqiptarëve edhe biznesmenë, individë dhe grupe e organizata nga rajon dhe më gjerë janë sensibilizuar me situatën dramatike që po ndodh në Durrës dhe në disa qytete përreth tij.
Një nga biznesmenët shqiptar që operon në Itali prej 20 vitesh ka hapur dyert e vilës së tij për familjet e prekura nga tërmeti. Altin Malka që njihet për zemrën e madhe dhe bujarinë që trashëgon nga familja, është ndier totalisht i prekur ne shpirt dhe ka lëshuar vilën në fshatin Suk 1 të Roskovecit për 3 familje që kanë nevojë për strehim.
Në vilën ku jetojnë dy prindërit e tij, z. Misir dhe znj. Flutura, biznesmeni Altin Malka premton që përveç strehimit, familjet që do të akomodohen, do të kenë çdo gjë të nevojshme për tu ndier si në shtëpinë e tyre. Për të gjithë ata që lexojnë këtë lajm dhe kanë nevojë për ndihmë dhe strehim të kontaktojnë në nr e tel: 0683399994.
