Papa Françesku ka vendosur të dhurojë 100 mijë euro në ndihmë të popullit shqiptar, të goditur nga tërmeti 6.4 ballë i 26 nëntorit i cili la pas viktima, qindra të plagosur dhe mijëra të pastrehë.
“Në këtë mënyrë Ati i Shenjtë dëshiron të shprehë afërsinë e tij shpirtërore dhe mbështetjen e tij atërore ndaj njerëzve dhe territoreve të prekura”, thuhet në komunikatë, e cila thotë se “shuma do të përdoret në dioqezat e përfshira në tërmet në vepra lehtësimi dhe ndihme, në marrëveshje me nunciaturën apostolike në Shqipëri”.
Kontributi, i cili shoqëron lutjen e Atit të Shenjtë për popullsinë e Shqipërisë, është pjesë e ndihmës që po aktivizohet në të gjithë Kishën Katolike dhe që përfshin, përveç Konferencave të ndryshme Episkopale, edhe shumë organizata bamirësie.
“Do të doja të dërgoja një përshëndetje dhe i jam afër popullit të dashur shqiptar, i cili ka vuajtur kaq shumë këto ditë”, tha Papa gjatë seancës së të mërkurës: “Shqipëria ishte vendi i parë evropian që doja të vizitoja. Jam afër viktimave, lutem për të vdekurit, për të plagosurit, për familjet. Zoti e bekoftë këtë popull, të cilin e dua aq shumë”.
