Një gjest për t’u duartrokitur nga komuna e Tetovës. Paratë që do të shpenzonte për zbukurimin e qytetit për festat e fundvitit, janë ridestinuar për ndihmë për bashkinë e Durrësit.
Rreth 25 mijë euro është ndihma të cilën komunën e Tetovës ka ndarë për Shqipërinë pas tërmetit katastrofal. Ky vendim u mor në një seancë të jashtëzakonshme të martën pasdite, ku morën pjesë këshilltarët e komunës së Tetovës të cilët u solidarizuan me situatën e krijuar në Shqipëri.
“Shpallëm ditë zie në territorin e Komunës së Tetovës për datat 27 dhe 28 nëntor. Ndihmë e njëhershme humanitare në shumë prej 1.500.000 denarësh Komunës së Durrësit, Republika e Shqipërisë,si mbështetje për ballafaqim me pasojat e tërmetit”, – tha Bekim Memeti, kryetar i këshillit të komunës së Tetovës.
Kryetarja e komunës së Tetovës Teuta Arifi, tha se gjatë vërshimeve të viti 2015, bashkia e parë që ka ndihmuar Tetovën ka qenë bashkia e Tiranës, prandaj edhe ne si komunë solidarizohemi me banorët e Shqipërisë. Ajo njoftoi se ka shpallur dy ditë zie në Tetovë, ndërsa nga Tetova janë nisur edhe 5 zjarrfikës të cilën do të ndihmojnë autoritetet vendore për nxjerrjen e personave nga rrënojat e ndërtesave të rrënuara nga tërmeti.
