Kanë rifilluar kërkimet nga ekipet e shpëtimit për nxjerrjen e të mbijetuarve dhe trupave pa jetë nga gërmadhat në banesat e shembura në Thumanë të Krujës.
Dyshohet se ka ende 20 persona nën rrënoja.
Numri i viktimave nga tërmeti me magnitudë 6.4, deri tani ka arritur në 24, ndërsa ai të plagosurve në 657 dhe dhe numri i shpëtuarve në 45.
Në ekipet e kërkimit përfshihen efektivë shqiptare dhe të huaj, që erdhën në ndihmë të ekipeve të emergjencave shqiptare një ditë më parë.
Në mbledhjen e jashtëzakonshme, Kryeministri Edi Rama tha se tërmeti ishte sfidues për shoqërinë tonë, për shtetin tonë, qeverinë tonë dhe në tërësi për kombin tonë.
“Ka qenë një ndër momentet më të errëta të jetës sonë. Mund të thuhet me plot gojën se nga të gjithë njerëzit nën uniformë të shtetit shqiptar është bërë një punë heroike. Dua të shpreh mirënjohjen dhe respektin dhe falënderimin të gjithë trupave të angazhuara në vijën e parë të frontit të kësaj përballjeje me një fatkeqësi të përmasave të jashtëzakonshme që nga ata të cilët rrezikuan jetën e tyre duke shpëtuar jetë të mbetura pezull në fije të perit deri tek ata që pritën dhe trajtuan gjithë infrastrukturën e ngritur të shërbimit shëndetësor me qindra të plagosur”, tha Rama.
