Klement Çupi është një prej personave që humbi jetën në tërmetin që goditi Shqipërinë mëngjesin e 26 nëntorit. 30-vjeçari ndodhej në Thumanë pranë familjes prej dy ditësh, por vizita nuk shkoi ashtu siç duhet.
Tërmeti prej 6.4 ballësh i shkallës Rihter në mëngjesin e së martës shembi banesën ku jetonte familja e tij, e cila u shua e tëra. Vdekja e nënës së tij është konfirmuar tashmë, teksa babai gjendet ende në rrënoja.
Klementi u nxorr i vdekur pas 16 orësh nën rrënoja, ndërsa vëllai i tij ndodhet në spitalin e Traumës jashtë rrëzikut për jetën.
Por kush ishte Klement Çupi, një prej viktimave të tërmetit të 26 nëntorit që tronditi Shqipërinë?
Media angleze ”Banbury Cake” i ka kushtuar një artikull fatit tragjik të Çupit dhe familjes së tij. Klementi jetonte në Angli dhe pak vite më parë u punësua si shofer taksie në qytetin e Oxford.
Ai mbërriti në këtë qytet në rininë e tij si refugjat, qytet në të cilin kreu studimet dhe vazhdoi të punojë në një pub si menaxher. Pas një eksperiencë të gjatë, Klementi u punësua si shofer taksie, teksa dallohej për korrektësinë dhe zgjuarsinë e tij.
Rreth fatit tragjik të familjes Çupi ka folur edhe menaxheri i përgjithshëm i kompanisë ku punonte Klementi, Aaron Singh:
“Është një ditë e trishtuar për të gjithë ne. Kjo është një tragjedi e madhe për ta dëgjuar,” tha shkurtimisht Singh.
Që prej mëngjesit të djeshëm, mbi 300 tërmete janë regjistruar në të gjithë Shqipërinë dhe numri i të vdekurve po vazhdon të rritet.
/Ora News.tv/
