Shqipëria u përfshi në një emergjencë tërmeti, me pasoja tragjike, mëngjesin e kësaj të Marte, ndërkohë që ende nuk janë rikuperuar dëmet e një tjetër lëvizjeje të fortë sizmike, ndodhur në Shtator të këtij viti.
Punonjësit e emergjencës po mundohen të minimizojnë dëmet në njerëz, të cilat sipas një bilanci paraprak, shënojnë mbi 10 viktima dhe shumë të plagosur, ndërkohë që autoritetet duhet të ndërmarrin së shpejti përllogaritjet e dëmeve.
Fatura financiare e tërmetit të fundit, referuar dëmeve që janë raportuar, pritet të jetë shumë më e lartë se sa ajo që pasoi lëkundjet e forta sizmike të dy muajve më parë.
Për tërmetin e Shtatorit 2019, kryeministri Edi Rama deklaroi fillimisht se ishte akorduar një shumë prej 6 milionë dollarësh, një shifër e cila, siç tha ai, mund të rritej në vijim.
E, në fakt, shifra, vetëm për për riparimin e pasojave në banesat e dëmtuara, u rrit me të paktën 3 herë.
Vetëm një ditë para tërmetit të së Martës, e konkretisht në 25 Nëntor 2019, Ministria e Mbrojtjes publikoi kompanitë fituese të tenderave të mbyllur, të cilët do të angazhohen për riparimin e banesave të dëmtuara në Shtator 2019, në Tiranë dhe Durrës.
Sipas të dhënave të Agjencisë së Prokurimit Publik janë 7 kompani të ndryshme, të cilat do të ndajnë fondim total prej rreth 15 miliardë lekëve të vjetra (rreth 15 milionë dollarë). Katër prej kompanive do të angazhohen për ndërtimin e riparimin e banesave, ndërsa 3 të tjera do të angazhohen në mbikëqyrjen e punimeve.
Kompanitë që ndajnë fondet e rindërtimit
Ministria e Mbrojtjes ka zhvilluar disa tendera me “negocimit paraprak, pa shpallje”, një procedurë e cila aplikohet, ndër të tjera, edhe për rastet e emergjencës.
Sipas kësaj procedure, autoriteti kontraktor, në këtë rast Ministria e Mbrojtjes, kontakton me të paktën 3 kompani, për të cilat vlerësohet se mund të përmbushin kërkesat e tenderit.
Në bazë të të dhënave zyrtare, rezulton se 3 kompani janë shpallur fituese të tenderave për “ndërtimin e shtëpive të dëmtuara nga tërmeti i rënë në qarqet Tiranë dhe Durrës në datë 21.09.2019”. Këto kompani kanë marrë secila nga një fond prej rreth 4.6 miliardë lekë (të vjetra), për një total prej 13.7 miliardë lekë.
Në të dhënat e Agjencisë së Prokurimit Publik, për secilin prej këtyre rasteve, shënohet se “nuk ka pasur skualifikime”, por nuk shënohet se cilët kanë qenë konkurentët e tjerë pjesëmarrës në këto procedura të mbyllura.
Më konkretisht, Ministria e Mbrojtjes ka shpallur fitues të këtyre tenderave, kompanitë si vijon:
– Kompania “4 A-M” sh.p.k., është shpallur fitues i tenderit për “Ndërtimi i shtëpive të dëmtuara nga tërmeti i rënë në qarqet Tiranë dhe Durrës në datë 21.09.2019”, me fond limit total 457,722,940 lekë (të reja).
– “Alba Konstruksion”, është shpallur fitues i tenderit “Ndërtimi i shtëpive të dëmtuara nga tërmeti i rënë në qarqet Tiranë dhe Durrës në datë 21.09.2019”, me fond limit total 457,722,940 lekë (të reja).
– “Hastoçi”, është shpallur fitues i tenderit “Ndërtimi i shtëpive të dëmtuara nga tërmeti i rënë në qarqet Tiranë dhe Durrës në datë 21.09.2019”, me fond limit total 457,722,940 lekë (të reja).
Krahas këtyre 3 kompanive, edhe një tjetër ka fituar një tender për rindërtim banesash, por me një vlerë më të vogël.
– “EURO-ALB”, është shpallur fitues e një tenderi për “Ndërtim i shtëpive të dëmtuara nga tërmeti në bashkinë Durrës”, me fond limit 100,505,333 lekë (të reja).
Ndërkohë, Ministria e Mbrojtjes ka shpërndarë edhe një fond prej rreth 160 milionë lekë (të vjetra) për 3 kompani të tjera, të cilat do të merren vetëm me mbikëqyrjen e punimeve të mësipërme.
Edhe për këto raste, Ministria e Mbrojtjen ka aplikuar procedurën e “negocimit paraprak, pa shpallje publike”.
Në Buletinin e Prokurimit Publik, janë renditur si fituese të tenderave për mbikqyrje punimesh, kompanitë si më poshtë:
– “Dricons” sh.p.k., fituese e tenderit Mbikëqyrje e punimeve për kontratën/projektin me objekt “Ndërtimi i shtëpive të dëmtuara nga tërmeti i rënë në qarqet Tiranë dhe Durrës në datë 21.09.2019”, me fond limit total 5.344.263 lekë (të reja).
– “Civil Cons” sh.p.k., fituese e tenderit “Mbikëqyrje e punimeve për kontratën/projektin me objekt “Ndërtimi i shtëpive të dëmtuara nga tërmeti i rënë në qarqet Tiranë dhe Durrës në datë 21.09.2019”, me fond limit total 5.344.263 lekë (të reja).
– “Palma Construction” sh.p.k., është gjithashtu fituese e tenderit “Mbikëqyrje e punimeve për kontratën/projektin me objekt “Ndërtimi i shtëpive të dëmtuara nga tërmeti i rënë në qarqet Tiranë dhe Durrës në datë 21.09.2019”, me fond limit total 5.344.263 lekë (të reja).
