Kryeministri Edi Rama ka propaganduar edhe në këtë ditë tragjike për vendin, që është goditur nga një tërmet me magnitudë 6.4 mëngjesin e sotëm, duke shkaktuar të paktën 7 viktima, qindra të plagosur dhe dëme të shumta materiale.
Rama, përmes postimeve në rrjetet sociale, mburret duke u sjellë si lider global, duke i dhënë një zë të veçantë komunikimeve me kryetarë të shteteve si Franca apo Italia.
Bashkë me informimin për zhvillimet nga tërmetet, Rama i thur statuset e tij me propagandë edhe në një ditë të vështirë si kjo e sotmja.
“Të gjithë miqtë e Shqipërisë po aktivizohen me shpejtësi. Kryeministri Conte e kryeministri Mitzotakis nisën avionët me skuadrat speciale. Presidenti Macron e Presidenti Erdogan më shprehën gatishmërinë për çdo nevojë”, shkruan në një postim në rrjetet sociale.
“Ambasadat e BE/SHBA kanë njoftuar qysh herët gatishmërinë. Qysh herët më ka telefonuar edhe Presidenti Thaçi, i cili ka aktivizuar skuadrat speciale të FSK drejt zonave të krizës emergjente për nxjerrjen e njerëzve ende nën rrënoja. Vazhdojnë kontaktet, ndërkohë që në terren po bëhet gjithçka e mundur në pikat ku kushtet janë më të rënda”, shtoi ai.
