Është liruar nga burgu Marash Arraj, i akuzuar për vrasjen e kushëririt të tij Lazër Arraj në fshatin Shosh të Dukagjinit. Gjykata ndryshoi masën nga “arrest me burg me afat 40 ditë” në “arrest shtëpie”.
Ndryshe nga policia që e akuzoi për veprat penale ‘Vrasja me paramendim’ dhe ‘Armëmbajtja pa leje’, Prokuroria ngriti ndaj 26-vjeçarit vetëm akuzën “për moskallëzim krimi”, duke kërkuar masën “arrest shtëpie”. Ndërsa pala mbrojtëse kërkoi masën “detyrim paraqitje”.
Në gjykatë, mbërritën edhe përgjigjet për provat materiale dhe i dyshuari nuk rezulton i përfshirë në asnjë përgjigje ekspertimi.
Marash Arraj ka mohuar që në fillim akuzën ndaj tij duke thënë se nuk ka asnjë lidhje me vrasjen e kushëririt dhe se nuk ka dijeni se kush e ka vrarë.
Vrasja ndodhi më 21 tetor dhe Lazër Arra u gjet i vdekur nga 26-vjeçari dhe familjarët e tij. 55-vjeçari kishte shkuar në fshat për të mbledhur ushqimet e dimrit, por u ekzekutua me armë zjarri. Ai u qëllua për vdekje, teksa po transportonte me kuaj disa produkte ushqimore nga arat e fshatit drejt rrugës kryesore të makinave.
