Nga Policia e Durrësit është finalizuar operacioni “Ekstradimi”, ku është arrestuar Jusuf Skënderi për qëllim ekstradimi drejt Italisë. Sipas Policisë, ai ishte në kërkim për trafik droge dhe pjesëmarrje në organizatë kriminale. Gjykata e Cagliarit,Itali, ka caktuar masën e sigurisë “Arrest me burg” për veprën penale “Drogë, Kokainë, Organizatë kriminale”.
“Specialistët për Hetimin e Narkotikëve në D.V.P Durrës, pas informacioneve të marra në rrugë operative dhe një punë të mirëorganizuar, në kuadër të operacionit ‘Ekstradimi’, bënë të mundur kapjen dhe arrestimin me qëllim ekstradimi drejt Italisë të shtetasit S.J., banues në Durrës. Ky shtetas ishte shpallur në kërkim ndërkombëtar nga Interpol Roma, pasi Gjykata e Cagliarit,Itali, me vendimin Nr.7855/17, datë 17.07.2019 ka caktuar masën e sigurisë ‘Arrest me burg’ për veprën penale ‘Drogë, Kokainë, Organizatë kriminale’ parashikuar nga Kodit Penal Italian. Interpol Tirana në bashkëpunim me Interpol Romën po vijon veprimet për ekstradimin e këtij shtetasi drejt Italisë”, njoftoi policia.
