Policia e Maltës ka arrestuar një biznesmen të fuqishëm pasi dyshohet se është përfshirë në vrasjen e bujshme të gazetares Daphne Caruana Galizia, thonë burime për Euronews.
Personi i vënë në pranga është Yorgen Fenech, pronar i kompanisë 17 Black, pasi policia pikasi se jahti i tij po largohej nga një ishull në Mesdhe, thanë burime që kishin njohuri për këtë çështje.
Fenech është drejtor dhe bashkëpronar i një kompanie që fitoi tenderin e një koncesioni gjigand në vitin 2013 nga shteti maltez për të ndërtuar një termocentral gazit në një ishull mesdhetar.
Jahti i tij luksoz Gio u largua pesë milje (tetë km) në veri të Valletta, pak para agimit, por Policia reagoi me shpejtësi dhe e detyroi të kthehej në port.
Arrestimi i tij erdhi një ditë pasi qeveria tha se do ta falte personin e arrestuar si ndërmjetës të dyshuar në vrasjen e gazetares Caruana Galizia nëse ai do të tregonte se kush fshihej pas vrasjes.
Ndërmjetësi i dyshuar besohet të ketë lidhur personin që dyshohet se ka kryer vrasjen me urdheruesit si dhe me ata që ndihmuan në gjetjen e pajisjes shpërthyese të përdorur në ekzekutim.
Caruana Galizia, 53-vjeçare, u vra në vitin 2017, pas një sulmi me makinë-bombë. Ajo, para se të vritej kishte shkruar për korrupsionin në elitën në Maltë.
