Forma e shkëlqyer e Benzemas me Realin e Madridit ka rihapur debatin për rikthimin e sulmuesit të luajë me kombëtaren, ku perfomanca e fundit e tij me Francën daton në vitin 2015.
Por një ditë më parë Presidenti i Federatës Franceze të Futbollit, Noel Le Graet në një intervistë për “RMC Sport” deklaroi se megjithëse Benzema është një sulmues i madh, aventura e tij me përfaqësuesen e Francës ka mbaruar.
Kësaj deklarate të ashpër të Le Graet, sulmuesi Benzema i është përgjigjur:
“Nëse ai mendon se nuk luaj më për Francën, atëherë të më lejojë të luaj për Algjerinë”.
Në parim është e pamundur që Benzema të luajë për Algjerinë, pasi FIFA në nenin e 18-të të saj thekson se:
“Çdo lojtar që ka luajtur një ndeshje me një kombëtare të caktuar qoftë edhe një minutë të vetëm në një turne zyrtar nuk ka të drejtën të zhvillojë një ndeshje ndërkombëtare me një përfaqësuese tjetër”.
Kësaj i shtohet fakti që, Benzema nuk ka nënshtetësi të dyfishtë atë Franceze dhe Algjeriane, pasi shteti i Francës e ndalon shtetësinë e dyfishtë, rast i njëjtë me atë të SHBA-së.
Por mundësia që Benzema të luajë për Algjerinë nuk është e pamundur pasi në nenin 18.2 të FIFA-s, theksohet:
“Nëse një lojtar i cili është aktivizuar nga Federata e tij në një ndeshje ndërkombëtare në përputhje me art. 5 par. 2, humbet shtetësinë e atij vendi pa miratimin dhe kundra vullnetit të tij për shkak të një vendimi nga autoritet qeveritare, ai mund të kërkojë leje për të luajtur me një kombëtare tjetër pasi të ketë fituar nënshtetësinë e atij vendi”.
Por gjithsesi kjo do të ishte e komplikuar për Benzema, i cili do t’i duhej të ndryshojë pasaportën dhe nënshtetësinë, dhe do të ishte qeveria franceze që do të vendoste për heqjen e shtetësisë, diçka që duket e pamundur.
