Ish-trajneri i Arsenalit, Arsene Wenger, i është rikthyer botës së futbollit, pasi është emëruar shef i zhvillimit të futbollit global pranë FIFA-s.
Kjo lëvizje mbyll spekulimet që e lidhnin francezin, me një rikthim të tij si trajner duke marrë postin drejtues të Bayern Munih.
Wenger u largua nga Arsenali në maj të vitit 2018, pas 22 viteve në drejtimin e skuadrës, duke fituar 3 tituj “Premier League” dhe shtatë “Fa Cup”.
Në lidhje me këtë pozicion të ri ai shprehet:
“Mezi pres të filloj këtë sfidë jashtëzakonisht të rëndësishme , jo vetëm sepse unë gjithmonë kam qenë i interesuar për analizimin e futbollit nga një perspektivë më e gjerë, por sepse misioni i FIFA-s si organi qeverisës i futbollit botëror është vërtet global”.
Që nga shkëputja e tij si trajner, ai ka punuar si analist futbolli në televizione të ndryshme.
