Fotot e tij bënë xhiron e rrjetit sot dhe provokuan reagimin e shumë qytetarëve. Pas disa orësh qëndrimi në spital, 80-vjeçari Çerçiz Jaçe rrëfen për Syri TV dhunën policore sot te “Unaza e Re”.
Me tre dhëmbë të thyer dhe me fraktura të tjera në trup, ai tregon se si policia sulmoi qytetarët me gaz lotsjellës, shkopinj gome dhe grushta.
“U futëm në banjo. Atje u helmuam të gjithë dhe dolëm. Sa dola, dy policë nga ndërhyrja e shpejtë më tërhoqën zvarrë. Pastaj më qëlluan me dy grushta nën nofull. Ikja tutje, më tërhoqën zvarrë prapë. Nuk isha në gjendje as të flisja, as të… Kur e mblodha çik veten i pyeta: kush më qëlloi nga ju? Jo ti je zhgaravitur vetë… Ty të vraftë Zoti, i thashë, ndërsa ai mu përgjigj: unë nuk besoj fare në Zot”, rrëfen 80-vjeçari.
80-vjeçari, duhet theksuar se, vuan nga diabeti, sëmundje kardiovaskulare dhe tensioni. Por mesa duket as kjo nuk e ka ndalur policinë të ndërmarrë aktin çnjerëzor dhe kriminal.
