Sulmuesi i Kombëtares, Sokol Cikalleshi, ishte i ftuar mbrëmjen e djeshme në emisionin “Procesi Sportiv”, ku foli rreth mungesës së tij prej dëmtimit në ndeshjet e nëntorit me Shqipërinë.
Sulmuesi theksoi se atmosfera te Kombëtarja është mjaft e mirë, ndërkohë që shprehet se me Rejan ekipi është në rrugën e duhur.
I pyetur për mungesën në këto dy ndeshje përmbyllëse të kualifikueseve ai përgjigjet:
“Kam një dëmtim të gradës së parë. Duhen 2 javë rikuperim dhe terapi”.
SITUATA NË KOMBËTARE
“Situata në grup është mjaft e mirë. Vijmë nga një fitore në Moldavi, dhe një përfaqësim i mirë në Turqi. Ka pak shqetësime me dëmtimet, por duke parë situatën që jemi, dhe duke përmendur dhe trajnerin e ri, jemi në rrugën e mbarë. Nuk duhet të kënaqemi me kaq, rruga është e gjatë dhe do përkushtim për ta mbajtur këtë pozitivitet. Jam i kënaqur që kemi Rejan, pasi nuk e ndjej vetëm unë frymën e re që është futur në grup. Në aspektin personal shpresoj të vazhdojë në Kombëtare. E ndjej që ka pasur një rritje në lojë. Për fat të keq, nuk jemi pranë kualifikimit. Ne si lojtarë, e vuajmë ende atë ndeshjen me Turqinë, pasi mund të ishte pikë”.
Ndërsa i pyetur për ish-trajnerin Panucci, ai deklaron:
“Fjalët për këtë temë do ishin të tepërta, por koha është treguesi më i mirë. Si Panucci, edhe unë, e kemi marrë përgjigjen. Dihet ku është Panucci tashmë, dhe ku jam unë”.
