Prokuroria ka firmosur urdhër-arrestin ndaj Agim Kajmakut, kryebashkiakut të shkarkuar të Vorës. Kajmakut iu ndërpre mandati i kryetarit të Bashkisë në kuadër të ligjit të dekriminalizimit, pasi nuk kishte deklaruar në formularin e vetë-deklarimit problemet me drejtësinë greke.
Zyrtarisht Ministria e Brendshme dhe prokuroria nuk e kanë mohuar lëshimin e këtij urdhër-arresti. Raportohet se policia nuk ka mundur të ekzekutojë urdhër-arrestin, pasi nuk e ka gjetur Kajmakun. Në kushte të tilla mësohet se ai është shpallur në kërkim.
Kajmaku dyshohet se ka kryer veprat penale: shpërdorim detyre, sipas nenit 248 te Kodit Penal, fallsifikimi i formulareve, neni 190 i Kodit Penal, dhe Ushtrimi i funksioneve pas dhënies fund të detyrës, neni 249 i Kodit Penal.
Ish-kryebashkiaku i Vorës u akuzua nga Partia Demokratike se kishte fshehur në formularin e Dekriminalizimit një dënim në Greqi, për falsifikim monedhash. Fillimisht Kajmaku i mohoi akuzat, por PD publikoi dokumentet e Gjykatës së Janinës, ku Agim Kajmaku ishte dënuar me emrin Jorgo Toto.
