Sonte në orën 19:00, luhet ndeshja testuese e stadiumit Arena Kombëtare, një javë para sfidës inaguruese mes Shqipërisë dhe Francës.
Në këtë ndeshje do të zbresin në fushë ekipi i vajzave të Vllaznisë me ato të Apolonisë, e vlefshme për kampionatin shqiptar të femrave.
Takimi mes Vllaznisë dhe Apolonisë për femra ishte në program të dielën e kaluar, por ajo u shty për shkak se u bë rimbiellja e barit të fushës për stinën e dimrit. Ndërkohë përgjatë gjithë ditëve të fundit është folur nëse stadiumi do të jetë apo jo gati për ndeshjen kualifikuese me Francën, e cila luhet më 17 nëntor, por në të gjitha daljet e tyre drejtuesit e federatës kanë dhënë siguri se ndaj kampionëve të botës do të luhet në këtë impiant.
Për të ndjekur sfidën e sotme të pranishëm do të jetë edhe disa inspektorë të UEFA-s, të cilët pas konfirmimit në parim do të bëjnë edhe ‘kualidimin’ përfundimtar të stadiumit.
