Kryeministri në ikje i Kosovës, Ramush Haradinaj një vit më parë, si kreu i qeverisë, vendosi taksën 100% ndaj produkteve me origjinë nga Serbia dhe Bosnja e Hercegovina.
Së fundmi, ai me anë të një postimi në rrjetin social Facebook, ka shkruar se taksa 100% ndaj produkteve serbe ishte një nga vendimet më të guximshme që nga shpallja e Pavarësisë së Kosovës.
Haradinaj ka këshilluar më tej pasardhësin e tij Kurtin që taksa të mos hiqet, por të mbetet deri në njohjen e Kosovës nga shteti serb.
Postimi i plotë:
Një vit më parë, Qeveria e Republikës së Kosovës, ka ndërmarrë një prej vendimeve më të guximshme që nga shpallja e pavarësisë, me vendosjen e tarifes prej 100% në mallërat e Serbisë, si masë ndaj fushatës agresive të shtetit serb.
Me këtë hap të rëndësishëm, Kosova ka treguar se Serbia nuk mund t’i japë detyra, kurse miqve ndërkombëtarë se nuk i nënshtrohemi shtetit serb. Vendosja e tarifes ndaj mallrave serbe, prej nëntorit të vitit të kaluar, ka ndikuar poashtu tej mase në fuqizimin e prodhuesve vendor.
Në thelb, ky veprim e ka delegjitimuar projektin e ndarjes së Kosovës, që fshihej nën idenë e korrigjimit të kufijve. Kjo masë është dëshmuar strategjike dhe duhet të mbetet deri në njohje të shtetit të Kosovës.
RH
