Kryeministri Edi Rama nuk mori pjesë në aktivitetin e PS, ndërsa shkroi në Twitter se po merret me ligjin special kundër krimit të organizuar. Pa dhënë shumë detaja se çfarë përmban ky ligj, ai shkruan se brenda nëntorit do filloje furtuna mbi folete e krimit dhe korbat e KÇK-së.
“Sot e kam nisur ditën me grupin e punës për Ligjin Special kundër krimit të organizuar+masat kundër KÇK që po finalizohen në letër. Brenda nëntorit fillon furtuna mbi foletë e krimit dhe korbat e KÇK”, shkruan mes të tjerash në një postim në rrjetin social.
Më herët gjatë një seance parlamentare, Rama paralajmëroi një ligj që sipas tij do të godasë prokurorët dhe gjyqtarët që bëjnë pjesë në grupimin që ai e quan KÇK (Kap ça të kapësh).
“Ata që e dinë që nuk do ta kalojnë vettingun janë lëshuar ‘Kap ç’a t’kapësh”. KÇK është organizata më e rrezikshme kriminale që vepron sot në vend sepse është e veshur me petkun e ligjit dhe funksionon si organizatë grabitësish ordinerë”, shprehej Rama.
Rama: Parlamenti duhet ti shpallë në kërkim njerëzit e drejtësisë, do bëjmë ligj për KÇK-të!
Shoqata Kombëtare e Gjyqtarëve të Republikës së Shqipërisë dhe Unioni i Gjyqtarëve të Shqipërisë i kanë cilësuar deklaratat e Ramës “një kërcënim ndaj pavarësisë së pushtetit gjyqësor, duke minuar ndërkaq besimin e qytetarëve në sistemin e drejtësisë”.
Ndërsa për opozitën, Rama nuk është njeriu i interesuar për të luftuar krimin, por i kapur prej tij.
