Mbrëmjen e djeshme, u zhvilluan 8 ndeshje për raundin e katërt të fazës në grupe në “UEFA Champions League”, ku si gjithmonë spektakli e surprizat ishin të pranishme.
Në rezultatet e djeshme bien në sy, barazimi pa gola i Barcelonës në shtëpi ndaj Slavia Pragës, humbja me përmbysje e Interit në transfertën ndaj Borussia Dortmundit me rezultatin 3-2, si dhe barazimi me një “lumë” golash, 4-4 mes Chelseat dhe Ajaksit.
Ndërsa natën e sotme, do të luhen dhe 8 ndeshje të tjera, të cilat përmbyllin ndeshjet e katërta të fazës së grupeve.
Juventusi dhe Atletico e Madridit luajnë në transfertë, respektivisht ndaj Lokomotivës së Moskës dhe Bayern Leverkusen, ku dy skuadrat kërkojnë fitoren, për të luftuar për “kokën” e grupit. Dy skuadrat e kryesojnë grupin D, me nga 7 pikë secila.
Ndërsa në Grupin A, Paris Saint Germain, ka një ndeshje të lehtë në letër e cila luan në shtëpi ndaj Club Bruge. Në këtë grup bën pjesë dhe Reali i Madridit, e cila luan ndaj turqve të Galatasarayt, dhe kërkon vetëm fitoren, pasi gjendet plot 5 pikë larg kryesuesve të PSG, të cilët në 3 ndeshje të luajtura kanë arritur të marrin pikë të plota.
Një ndeshje tjetër e rëndësishme është ajo mes Tottenham dhe Crvena zvezda, ku skuadra londineze gjendet në vendin e dytë pas Bayernit të Munihut në kuotën e 4 pikëve dhe i duhet fitorja për të larguar vendin e tretë që mbahet po nga Crvena zvezda, në kuotën e tre pikëve. Ndërsa Bajerni i Munihut i cili kryeson Grupin B, gjendet në pozita komode, pasi gjendet në kuotën e 9 pikëve në tre ndeshje, dhe sonte pret në shtëpi vendin e fundit që mbahet nga Olympiacos.
