Kapet dhe ndalohet një shtetas i shpallur në kërkim për shpërdorim detyre.
“Nga strukturat e Drejtorisë Vendore të Policisë Shkodër, në bazë të informacioneve të marra në rrugë operative, është bërë kapja e personit të shpallur në kërkim, shtetasit Ardian Loci, 48 vjeç, banues në lagjen ‘Skenderbeg’, Shkodër”, njoftoi policia. “Kapja dhe ndalimi i tij u bë pasi Gjykata e Apelit Shkodër, me vendim nr. 243, datë 21.06.2019 e ka dënuar me 1 vit e 10 muaj burg, për veprën penale ‘Shpërdorimi i detyrës’”, shtuan të njëjtat burime.
Ardian Loci, ish-shoferi i FNSH-së në Shkodër, sipas akuzës, dekonspironte aksionet e policisë, duke dhënë informata te një grup që merrej me kultivim kanabisi në Dukagjin.
Në shtator të vitit të kaluar, Gjykata e Apelit në Shkodër ka dënuar me 42 vite 5 muaj burg 10 persona të akuzuar si kultivues të bimëve narkotike kanabis sativa, 8 të tjerë janë dënuar me 28 vite e 8 muaj burg, por janë lënë të lirë me kushtin që për 4 vite të mos kryejnë vepër penale. Një tjetër është shpallur i pafajshëm dhe për një tjetër shtetas është pushuar çështja pasi është ndarë nga jeta. Ndërsa për Ardian Locin dhe 6 persona të tjerë çështja u gjykua veçmas.
Grupit u janë sekuestruar 31.386 rrënjë kanabis në 166 parcela gjithsej, përmes 28 aksioneve të ndryshme gjatë periudhës 28 qershor -28 shtator 2016.
