Njëra këmbë e urës së Vanës në lumin e Kalasë në Delvinë është shembur, duke izoluar banorët.
Banorët prej kohësh kishin shprehur shqetësimin për urën, por pavarësisht kërkesave asnjë institucion nuk kishte reaguar.
Ujërat e lumit kanë gërryer bazamentin e urës, duke bërë që kjo e fundit të mbahet vetëm mbi disa inerte.
Kujtojmë se në dhjetor të vitit 2017 kjo urë u shemb duke rrezikuar jetën e disa udhëtarëve, pasi një furgon mbeti mbi urën e shembur.
Qeveria në bashkëpunim me Forcat e Armatosura ngritën sërish urën brenda 6 ditëve, por thanë se ura kishte sërish nevojë për ndërhyrje, pasi nuk ishte aq e fortë sa duhej, pasi ishte ndërtuar në kushte emergjence. Që prej asaj kohe në urë nuk është bërë asnjë punim.
