Nga Boldnews.al
Komisioni Qendror i Zgjedhjeve, në shumicë absolute nga Partia Socialiste, shkarkoi kryetarin “e emëruar” të Bashkisë së Vorës, Agim Kajmaku, me një vendim politik të marrë nga zyra e Edi Ramës.
KQZ pranoi kërkesën e Prokurorisë së Përgjithshme për ndërprerjen e mandatit të kryebashkiakut të Vorës, për shkak se ai nuk kishte deklaruar në formularin e Dekriminalizimit një arrestim në Greqi, për falsifikim monedhash.
Kjo vendimmarrja e 5 anëtarëve të KQZ-së u parapri nga “thashetheme” politike, në bazë të të cilave qëndronte idea se Agim Kajmaku nuk do të shkarkohej, për shkak se ai rezultoi i pafajshëm nga autoritetet greke për episodin, për të cilin ishte arrestuar në vitin 2003.
Por, me një lëvizje jo-edhe-aq surprizë, 4 anëtarët e zgjedhur nga Partia Socialiste në Komisionin Qendror të Zgjedhjeve dhe kryetari i zgjedhur nga opozita, votuan unanimisht për shkarkimin e Agim Kajmakut.
Ky vendim nuk duket se është aq “politikisht korrekt”, të paktën nga ana e Edi Ramës.
Ai komandoi anëtarët e KQZ-së që të shkarkonin Kajmakun, në tentativë për të bindur, nuk dihet se kë, që kryeministri nuk mbështet persona me rekorde kriminale në poste drejtuese.
Kjo tentativë nuk është aspak bindëse, pasi Rama është përzgjedhësi, promotori dhe mbështetësi kryesor i këtyre tipave që hyjnë në politikë, pasi kanë provuar më parë dyert e burgut.
Ka edhe një arsye të dytë, shumë të fortë, për të cilën Edi Rama “shiti” momentalisht Kajmakun.
Në rast se situata politike do të vijojë të jetë e tillë, me ngërç dhe pa asnjë reflektim nga maxhoranca, Bashkia e Vorës do të vijojë të jetë nën kontrollin e personave “të emëruar” dhe jo të zgjedhur, të Edi Ramës.
Kushtetuta dhe ligji për qeverisjen vendore parashikon se, në rast shkarkimi të kryetarit të Bashkisë, detyrën e mban një prej nënkryetarëve, deri në zhvillimin e zgjedhjeve të parakohshme.
Pikërisht, tek “zgjedhjet e parakohshme” ndërlikohet situata. Kushtetuta ia njeh Presidentit të Republikës caktimin e datës së zgjedhjeve, përfshirë edhe ato të parakohshmet.
Agim Kajmaku u shpall fitues në votimet mono-partiake të 30 Qershorit, për të cilat, formalisht, nuk kishte një dekret për zhvillimin e tyre.
Presidenti Ilir Meta “shfuqizoi” një dekret të mëparshëm të tij, në të cilin ishte parashikuar data 30 Qershor si dita kur do të zhvilloheshin zgjedhjet lokale. Meta, në asnjë rast, publikisht dhe zyrtarisht, nuk e ka njohur 30 Qershorin si ditë zgjedhjesh.
Në bazë të këtij qëndrimi, Meta, natyrisht, nuk njeh as produktin e 30 Qershorit, përfshirë edhe votimet për Bashkinë e Vorës.
Ndaj, Meta, me shumë mundësi, nuk do të dekretojë një datë zgjedhjesh të parakohshme për Bashkinë e Vorës, për shkak se Presidenti nuk njeh as procesin e emërimit të Kajmakut në detyrë.
Në këto kushte, Bashkia e Vorës mbetet në dorë të nënkryetarit, një zgjedhje natyrisht e Agim Kajmakut, me bekimin e Edi Ramës.
Nga ana tjetër, po analizojmë një situatë hipotetike, në të cilën Presidenti Meta cakton një datë për “zgjedhjet e parakohshme” për Bashkinë e Vorës.
Në një rast të tillë, kur opozita vijon të mbështesë qëndrimin për të mos marrë pjesë në institucione politike me Edi Ramën kryeministër, Partia Socialiste, madje sërish Agim Kajmaku, mund të “emërohet” sërish në krye të Bashkisë së Vorës.
Agim Kajmaku, bëri “gabimin fatal” që fshehu arrestimin, me shpresën se e kaluara kriminale nuk do t’i dilte para syve në momentin që ai arriti zenithin politik.
Por, në rast të “zgjedhjeve të parakohshme” dhe pa rival nga opozita, Kajmaku tashmë e ka shumë më të thjeshtë. Ai vendoset sërish kandidat për Bashkinë e Vorës. Ndryshe nga hera e parë, ai e plotëson saktë formularin e dekriminalizimit, përfshirë arrestimin dhe shpalljen e pafajshëm në Greqi.
Me formular dekriminalizimi të saktë, si edhe pa një rival përballë, Agim Kajmaku ka mundësitë të emërohet sërish kryetar i Bashkisë së Vorës.
Pra, këto duket se janë llogaritë e Edi Ramës. Në çdo rast, si me Kajmak, si pa të, kryeministri ka dhe vijon të ketë nën kontroll një prej territoreve me potenciale të larta infrastrukturore, shumë pranë Tiranës. “Oligarkët” pranë Ramës e njohin shumë mirë vlerën e asaj zone.
