Prokurorja e Krimeve të Rënda, Donika Prela ka vizituar në spitalin rajonal të Durrësit prokurorin Arjan Ndoja, i cili u plagos rëndë këtë pasdite tek mbikalimi i Shkozetit.Bashkë me Ndojën mbetën të plagosur dhe dy persona të tjerë. Ndoja aktualisht ndodhet nën kujdesin e mjekëve, ndërkohë familjarët janë shprehur se ndaj tij është qëlluar me 10 plumba. Andi Maloku, shoferi i Ndojës, i plagosur rëndë. Ndërkohë Aleksadër Laho, një nga personazhet e njohur te drejtësisë është personi i tretë i plagosur.
Mësohet se Ndoja ndodhet jashtë rrezikut për jetën. Është duke marrë mjekimin e duhur në spital. Bashkë me Prelën në spital kanë qenë edhe përfaqësues të tjerë të Policisë së Shtetit dhe të Prokurorisë së Tiranës. Çështja është duke u hetuar nga prokurori i krimeve të rënda Anton Martini.
