Për të marrë një leje për punime në shtëpi, të cilat lidhen me ndërtime shkallësh, ndryshime fasadash apo struktura me materiale të lehta të ccmontueshme, i interesuari duhet të presë 20 ditë.
Kjo të paktën përcaktohet në ndryshimet që i janë bërë rregullores aktuale, ku më parë afati për marrjen e lejes ishte vetëm 10 ditë.
Ndryshimet ndodhin në një kohë kur në Tiranë po lulëzojnë kullat apo ndërtimet shumëkatëshe, ndërsa është vënë alarmi për pakësimin e hapësira publike.
Pothuajse e gjithë qendra e Tiranës po rrethohet me kulla, dhe në planet e qeverisë është që edhe zona te Teatri Kombëtar, të shndërrohet në një shesh ndërtimi.
Në rrezik është edhe Kopshti Botanik, që me një vendim qeverie i kalon në administrim Bashkisë së Tiranës, por ccështja ka mbetur pezull për shkak të një vendimi gjykate.
Pra në një kohë kur po përdoret një zemërgjerësi për të firmosur lejet e shumëkatësheve, Bashkia e Tiranës, shtrëngon dorën në lejet e rikonstruksioneve, që maksimumi kërkohen ose nga ata që kanë shtëpi njëkatëshe, ose nga banorët që jetojnë në ato që quhen pallate të vjetra.
Në rregulloren e vjetër përcaktohetj se : autoriteti përgjegjës vendos, brenda 10 ditëve pune nga data e dorëzimit të aplikimit për leje ndërtimi me procedurë të përshpejtuar, për rastet: a) e punimeve që kanë vëllim të kufizuar ndërtimi ose impakt të ulët në territor, si: i. shkallë; ii. rrethime; iii. struktura me materiale të lehta e të çmontueshme; iv. ndryshime fasade etj. b) kur aplikuesi paguan tarifë aplikimi të barabartë me dhjetëfishin e tarifës së parashikuar për leje ndërtimi” thuhej në rregulloren e vjetër.
Në ndryshimin e ri thuhet se afati kalon në 20 ditë. Teksa shtohet edhe një pikë e re pas pikës një të këtij neni që thekson se procedura e përshpejtuar jepet vetëm në rastet kur ka emergjenca.
“Autoriteti përgjegjës vendos me procedurë të përshpejtuar, brenda 5 (pesë) ditëve pune nga data e paraqitjes së aplikimit në sistemin e-leje, për pajisjen me leje ndërtimi, për ndërtimin, riparimin apo restaurimin e objekteve të dëmtuara, si pasojë e fatkeqësive natyrore dhe emergjencave civile. Përjashtimisht, vetëm për këto raste:
a) aplikimet paraqiten për shqyrtim dhe miratim nëpërmjet sistemit elektronik të lejeve nga ana e Institutit të Ndërtimit;
b) dokumentacioni i vetëm që duhet të dorëzohet nga aplikuesi është: i. raporti i hartuar nga komisioni apo struktura përkatëse e emergjencave civile, që vërteton shkaktimin e dëmit si pasojë e fatkeqësisë natyrore; ii. projekti teknik/konstruktiv i hartuar nga Instituti i Ndërtimit” thuhet në rregulloren e re.
Një tjetër element që ndryshon është ajo për dokumentacionin që duhet të paraqitet nga ndërtuesit lidhur me marrjen e certifikatës së përdorimit. Referuar disa ndryshimeve ligjore që kërkojnë sigurim 10 vjeçar të apartamenteve të reja rregullorja ka shtuar se mes një liste të gjatë dokumentesh ndërtuesit duhet të paraqesin edhe policën e sigurimit.
