Shpesh gra e vajza kanë ngritur shqetësimin për ngacmime seksuale në vendet punës, por mungesa e mbështetjes, qoftë nga institucionet shtetërore, apo edhe gjykatat ka bërë që këto raste të mbetën në hije. Të shumta janë viktimat që bien pre e një fenomeni të tillë, por mentaliteti i shoqërisë ka bërë që ato të bien viktimë dy herë.
Avokatja Denisa Daka ka bërë një denoncim publik se si vajzat dhe gratë që ngacmohen seksualisht në vendet e punës dhe fatkeqësisht shoqëria, por edhe instancat shtetërore jo vetëm që nuk i mbështesin, por heshtin duke i detyruar viktimat që të tërheqin akuzat e ngritura.
Të dhënat e anketës së fundit për dhunën ndaj grave në Shqipëri të udhëhequr nga OSBE tregojnë se 34% e grave kanë përjetuar të paktën një formë të ngacmimit seksual që kur ato ishin 15 vjeç. Ndërsa 17 për qind e grave kanë raportuar se kanë përjetuar një ngacmim seksual serioz në 12 muaj para zhvillimit të sondazhit. Por pavarësisht këtyre të dhënave, asnjë rast i denoncuar nuk ka shkuar deri në fund të procesit gjyqësor. Por cilat janë arsyet sipas avokates që gratë dhe vajzat heqin dorë?
Fatkeqësia më e madhe, sipas avokates Daka është se viktimat e vuajnë dy herë, pasi edhe shoqëria i paragjykon. Ndaj ajo ka një apel sidomos për gratë në politikë që në të tilla raste të reagojnë.
/Klan Plus/
