Granit Xhaka mund të humbasë shiritin e kapitenit tek skuadra e Arsenalit, pas fjalëve jo të hijshme në drejtim të tifozëve.
Mesfushori me origjinë shqiptare, hodhi shiritin e kapitenit, kur u zëvendësua nga Unai Emery pas 61 minutash lojë, në barazimin me Crystal Palace.
Por nuk përfundoi këtu, pasi nga fishkëllimat e tifozëve në drejtim të tij, 27 vjeçari reagoi dhe ndaj tyre, teksa bëri me shenjë për të fishkëllyer më shumë, dhe më pas hoqi dhe fanellën, duke u larguar në dhomat e zhveshjes.
Në lidhje me këtë situatë trajneri Emery, tha për mediat angleze:
“Do të flasim me të . Në atë moment ishte gjaknxehtë”
“Xhaka ishte gabim. Tani duhet të ruajmë qetësinë dhe të flasim me të brenda klubit rreth atij reagimi.”
“Ne jemi këtu pasi kemi fansat. Ne luajmë për ta dhe duhet t’i respektojmë ata, pavarësisht nëse ata duartrokasin apo kritikojnë.”
“Tani nuk është koha të flasim për shiritin e kapitenit por jemi duke punuar me çdo lojtar për t’i ndihmuar në menaxhimin e presionit”.
Ndërkohë nga mediat britanike, kërkohet heqja e titullit të kapitenit të Xhakës, madje reagimet shkojnë më tej deri në largimin e tij nga skuadra.
