Autoritetet italiane kanë identifikuar 45-vjeçarin që u vra nga kunati i tij paraditen e së dielës në Nettuno të Italisë. Viktima është Shpend Allushi, shkruajnë mediat e vendit fqinj. Mes tij dhe kunatit Luan Zalta 50 vjeç pati një konflikt familjar. Raportohet se Allushi kishte shkuar në banesën e kunatit të tij për të sqaruar këtë çështje. Por ndodhi tragjedia.
Tentativa për të sqaruar sherrin në familje, degradoi në përdorimin e armës. Kunati i viktimës nxorri pushkën nga dollapi ku e mbante të fshehur dhe qëlloi me armë në drejtim të Shpend Allushit. Ky i fundit humbi jetën menjëherë si pasojë e gjakderdhjes.
Sipas mediave italiane, hetuesit kanë arritur në përfundimin se sherri mes tyre ka ndodhur pasi autori kishte dyshime për marrëdhënien në cift mes kunatit dhe të motrës së tij. Vëllai, tani i akuzuar për vrasje nuk duronte dot tradhëtinë që viktima i bënte gruas, pra motrës së tij.
Mediat italiane shkruajnë se 50-vjeçari e posedonte armën në mënyrë të paligjshme. Gruaja e viktimës, ndërhyri dhe tentoi të ndalonte vëllain e saj. Gjatë përplasjes mes motrës dhe vëllait, pati edhe një të shtënë tjetër me armë zjarri, por për fat të mirë nuk u lëndua asnjë prej tyre.
Krimi ndodhi në banesën private të Luan Zaltës. Në vendngjarje shkuan forcat policore, të cilat arrestuan 50-vjeçarin me akuzën e vrasjes. Ishte pikërisht kunati, 50-vjeçari me profesion kamionist, që lajmëroi autoritetet për ngjarjen e ndodhur, dhe priti mbërritjen e karabinierëve për ta arrestuar. Hetimet për tragjedinë në familjen shqiptare do të përcaktojnë nëse autori e vrau me paramendim ose jo kunatin e tij.
