Nga Boldnews.al
Tre seanca të shtyra në mënyrë të dyshimtë gjatë dy muajve të fundit, kanë penguar nisjen e procesit gjyqësor në Gjykatën e Apelit Vlorë ndaj dy të rinjve, të dënuar nga shkalla e parë Fier për vjedhjen e mbi 100 milionë lekë në biznesin e familjes Kalemaj, në Levan.
“Boldnews.al” ka raportuar më parë për dyshimet e Floresha dhe Xhemal Kalemaj për “procedurat” e ndjekura në gjykatë, me qëllim vonesën e nisjes së procesit gjyqësor kundër Renaldo Latifit dhe Xhuliano Muça.
Dy seancat e para në Apelin e Vlorës u shtynë, pasi gjykata nuk “arriti”, për rreth një muaj, të siguronte një trupë gjyqtarësh që nuk ishin në kushtet e konfliktit të interesit. “Ndërsa seanca e tretë, u shty, pasi Drejtoria e Burgjeve kishte ‘harruar’ të sillte një prej të pandehurve në gjyq”, thotë Xhemal Kalemaj për “Boldnews.al”.
Bashkëshortët Kalemaj kanë qenë të pranishën në çdo seancë, megjithëse të shtyra, të zhvilluara nga fillimi i Shtatorit deri në fund të Tetorit 2019, në Gjykatën e Apelit të Vlorës.
Atyre po u forcohet gjithnjë e më shumë bindja se strukturat shtetërore, përfshirë gjykatën, po bëjnë gjithçka për të favorizuar dy personat e akuzuar për vjedhjen e kursimeve të tyre të të gjithë jetës.
“Duan që të shtyjnë sa më shumë afatet e paraburgimit, që hajdutët të fitojnë lirinë sa më shpejt”, thotë Xhemal Kalemaj, i cili ndihet i pafuqishëm para neglizhencës së organeve shtetërore.
Historia
Mëngjesin e 29 Majit 2017, Renaldo Latifi dhe Xhuliano Muça vjedhin mbi 100 milionë lekë (të vjetra) në biznesin e familjes Kalemaj, në Levan të Fierit. Pavarësisht se bashkëshortët Floresha dhe Xhemal Kalemaj kanë dyshimet e tyre se grupi i hajdutëve është shumë më i madh, gjithësesi Prokuroria dhe Gjykata e Fierit identifikoi si autorë dy të rinjtë Latifi dhe Muça.
Momenti kur një prej të pandehurve ka vjedhur çelësin e automjetit të Xhemal Kalemaj, ku gjendej shuma e parave të grabitura
Dy të pandehurit u arrestuan në Shtator 2017 dhe, rreth dy vjet pas ngjarjes, konkretisht në 29 Prill 2019, gjykata i dënon respektivisht Renaldo Latifin me 6 vjet burgim dhe Xhuliano Muçan me 5 vjet e 4 muaj burgim.
Të pandehurin e ankimojnë vendimin në Gjykatën e Apelit të Vlorës. Kjo e fundit zhvillon seancën e parë në datën 12 Shtator 2019. Trupa gjykuese e përzgjedhur me short përbëhej nga kryesues Petrit Aliaj dhe anëtarë Sokol Ngresi e Nazmi Troka.
Në këtë seancë, dy prej gjyqtarëve, Petrit Aliaj e Sokol Ngresi deklaruan se do të japin dorëheqjen, pasi kishin shqyrtuar kërkesa paraprake të të pandehurve. Seanca e radhës shtyhet për në datën 1 Tetor 2019.
Në këtë seancë të dytë, ku në sallë ishte vetëm trupa gjykuese dhe të dëmtuarit Kalemaj, u vendos sërish shtyrja, për shkak të një situate në dukje absurde. Për rreth 20 ditë nga seanca e parë, kryetarja e Gjykatës së Apelit, Iliba Bezat, nuk kishte shqyrtuar kërkesën për dorëheqjen të dy anëtarëve të trupës gjykuese.
“Harresa” e Burgjeve
Në seancën e tretë, zhvilluar këtë të Premte (26.10), më në fund, ishte ndryshuar trupa gjykuese. Anëtarët e rinj janë Iliba Bezat, Skënder Damini dhe Margarita Buhali.
Në seancë ishin të pranishëm edhe familjarët Kalemaj, si edhe një prej të pandehurve, Renaldo Latifi, së bashku me avokatin e tij.
Ndërkohë që mungonte i pandehuri tjetër, Xhuliano Muça. Kryesuerja e trupës gjykuese, Iliba Bezat deklaroi në seancë se të pandehurit ishin njoftuar zyrtarisht për të qenë të pranishëm në seancë. Por, siç u konstatua, i arrestuari Muça nuk ishte në sallë dhe, për më tepër, nuk kishte deleguar formalisht kompetencat e përfaqësimit avokatit, i cili ishte gjithashtu në sallë.
Në këto kushte, trupa gjykuese e shtyu sërish seancën, për shkak se në proces duhet të jenë të dy të pandehurit ose, më së paku, të deklarojnë zyrtarisht se duan të përfaqësohen nga avokatët mbrojtës.
Xhemal Kalemaj ka dyshimet e tij për këtë situatë dhe për rolin e administratës së Burgjeve. “Dy të pandehurit, Renaldo Latifi dhe Xhuliano Muça ndodhen të arrestuar në të njëjtin vend. Si ka mundësi që administrata e Burgjeve gjen dhe informon vetëm njërin-Latifin, ndërkohë që ‘harron’ të njoftojë tjetrin-Muçan”, shprehet ai për “Boldnews.al”.
“Ne, si familje, po bindemi çdo herë e më shumë se institucionet shtetërore po bëjnë gjithçka për të favorizuar hajdutët, të cilët kanë mbështetje edhe nga njerëz të tjerë. Deri sa Gjykata e Apelit të shqyrtojë çështjen e tyre, dy hajdutëve, me shumë mundësi, do t’u mbetet shumë pak kohë për të qëndruar në burg, pasi do të përfitojnë nga koha e qëndrimit në paraburgim”, thotë Xhemal Kalemaj.
Gjithësesi, ai dhe bashkëshortja e tij, Floresha, thonë se nuk do të ndalen derisa drejtësia të japë vendimin e saj.
