Në zgjedhjet e parakohshme në Maqedoninë e Veriut, partitë politike shqiptare mund të bëhen bllok në dy koalicione. Ideja është hedhur nga Kryetari i Aleancës për Shqiptarët, Ziadin Sela, i cili në emisionin “Rruga Drejtë” në Alsat M ka ftuar publikisht për koalicion parazgjedhor Lëvizjen Besa dhe Alternativën.
“Nuk kam preferenca, në lidhje me subjektet politike. Ne kemi qenë në koalicion në 2016-tën, edhe duke e ditur forcën politike të atyre dy partive politike. Ne gjithmonë jemi të hapur për unitet. Momenti në të cilën ndodhet Aleanca për Shqiptarët, është e vetëdijshme për të sjellë ndryshimin dhe demokracinë, në këtë vend që jeton në monizëm. Për këtë qëllim, është thirrja që e shohim nga qytetarët. Jemi të gatshëm për koalicionim. Nuk kam pasur rezerva për koalicionim me Lëvizjen Besa. Inatet personale nuk kanë asnjë vlerë, për shkak se nga inatet personale mund të na ikin ende më tepër qytetarët. Pushteti po politizon gjithçka. Ne punojmë për ndryshimin. Nuk kam pas akoma negociata për zgjedhje, qoftë me Lëvizjen BESA qoftë me Alterantivën. Ju bëj thirje publike: Aleanca për Shqiptarët është e hapur për koalicion me të dyja bashk. Menduh Thaçin le ta merr Ali Ahmeti, bile të merr dhe Vesel Mehmedin dhe Gëzim Ostrenin ndërsa ne do të jemi në anën tjetër, pra le të bëhen dy blloke politike” – theksoi lideri i Aleancës për Shqiptarët.
Parlamenti i Maqedonisë së Veriut ka 120 deputetë. Në zgjedhjet parlamentare të vitit 2016 partia e Zaev, Lidhja Socialdemokrate, fitoi 49 mandate. Koalicioni VMRO-DPMNE i drejtuar nga Nikola Gruevski fitoi 51, por nuk gëzoi mbështetje për krijimin e qeverisë.
