Ardian Mema nuk do të jetë më trajner i Tiranës. “Panorama Sport” mëson se palët kanë arritur marrëveshjen për ndërprerjen e bashkëpunimit më njëri-tjetrin, teksa në ditët në vijim, pritet të zyrtarizohet edhe trajneri i ri që do të drejtojë 24-herë kampionët e vendit.
Humbja ndaj Bylisit ka rezultuar fatale për trajnerin Mema, i cili i ka dhënë fund aventurës me bardheblutë. Kujtojmë që ditën e sotme, tekniku nuk ishte i pranishëm në stërvitje, pasi zhvilloi një takim me presidentin Halili!
47-vjeçari mori drejtimin vitin e shkuar ne javen e 9 ne ndeshjen me Flamurtarin pasi kishte rolin e zv.trajnerit me Ilir Dajen tek skuadra vlonjate dhe largohet pas javes se 9 nga drejtimi i skuadres bardheblu.
Pavarësisht kontratës që trajneri kishte me Tiranën, klubi nuk do të paguajë dëmshpërblim për këtë largim, pasi ndarja u arrit me konsensus.
Mema në fillim të këtij sezoni kishte mbështetjen e plot nga klubi, por mungesa e rezultateve pozitive tronditi stolin e tij. Kandidaturat për zëvendësimin e Memës, janë të shumta, por emri më i afërt është ai i Julian Ahmataj, si dhe trajneri i moshave, Bledar Devolli.
Në orët në vijim pritet të vijë edhe njoftimi zyrtar i klubit për largimin e trajnerit Mema, si dhe emërimi i trajnerit të ri!
