Një ushtar rus vrau tetë kolegë të tij në një bazë ushtarake në skajin e largët lindor të vendit. Agjencitë ruse të lajmeve raportuan se të paktën dy persona të tjerë u plagosën gjatë sulmit në bazën e Gorny-t, në rajonin e Liqenit Baikal, rreth 150 kilometra në veri të kufirit me Mongolinë.
Ministria e Mbrojtjes e Rusisë tha në një deklaratë se dy ushtarët që u plagosën “u dërguan menjëherë në një spital ushtarak, ku morën ndihmën e nevojshme të kualifikuar mjekësore.
Gjendja e tyre është jashtë rrezikut për jetën”. Të njëjtat burime pohuan se ushtari përgjegjës për masakrën “mund të ketë pësuar një ezaurim nervor”, por ata këmbëngulën se kjo ka ndodhur për shkak të rrethanave personale që nuk kishin lidhje me shërbimin ushtarak”. Agjencia e lajmeve TASS raportoi se dy nga të vrarët ishin oficerë ndërsa pjesa tjetër, “rekrutë dhe kontraktues”. Autori është arrestuar menjëherë pas sulmit.
