Merr 150 mijë euro të dhuruara për të birin e sëmurë dhe i harxhon për t’u argëtuar në një festë hard, ndërkohë fëmija dyvjeçar vdes! Një histori tronditëse vjen nga Brazili, ku i vogli Joao Miguel Alves, i cili vuante nga një atrofi muskulore shpinore e humbi betejën dhe u nda nga jeta më 17 tetor. Babai i tij, 37-vjeçari Mateus Henrique Leroy Alves, u arrestua.
Pasi fëmija u diagnostikua me sëmundjen, Mateus dhe gruaja e tij Karine Rodrigues nisën një fushatë për mbledhje fondesh për djalin e tyre. Vetëm një dozë e ilaçit kushtonte 80 mijë euro dhe qeveria kishte rënë dakord të paguante vetëm tre kurat e para. Paratë e grumbulluara nuk ishin pak, plot 230 mijë euro, pas një fushate të gjatë bamirësie.
Kurat për Joaon nisën në gusht të vitit të kaluar, paratë e grumbulluara ishin në katër llogari bankare. Por majin e kaluar babai kishte nisur të merrte shuma të mëdha parash, kur e shoqja e vuri ré dhe pasi Mateus e kishte braktisur atë dhe djalin për t’u transferuar në një hotel, e denoncoi.
Ai kishte kaluar disa javë pikërisht në atë hotel në shoqërinë e prostitutave, duke shpenzuar rreth 150 mijë euro për veshje, ora, alkool e drogë, por kur u arrestua tha se kishte qenë viktimë e kriminalitetit. Vetëm hetimet do ta përcaktojnë se cila është e vërteta, nëse ishte viktimë apo dëshpërimi për të birin e sëmurë e bëri të merrte atë rrugë.
