Janë zbardhur detaje të reja nga ngjarja e ndodhur mbasditen e sotme në në rrugën e Uznovës, Berat. Sherri për një borxh për pak sa nuk u ka marrë jetën 3 punëtorëve të një lavazhi dhe një qytetari të rastësishëm që po lante makinën, kur ndodhi sherri.
Tre shtetas, që udhëtonin me një automjet tip Benz kanë qëlluar me pistoletë në drejtim të lavazhit ku kanë qënë tre punëtorët Ergit Kocaqi, Krenar Dikollari dhe Erjon Gërmau si dhe qytetari Muhamet Hysa.
Nga automjeti tip Benz, që drejtohej nga 25-vjeçari Xhoni Spahiu është qëlluar një karikator i tërë pistolete nga i ati i tij, 52-vjeçari Vladimir Spahiu por fatmirësisht plumbat nuk kanë prekur asnjë nga katër shtetasit që ndodheshin në lavazh.
Pasi qëlluan në drejtim të lavazhit, babë e bir së bashku me shtetasin Petrit Qypi, 66-vjeç janë larguar nga vendngjarja dhe në përpjekje për ti shpëtuar forcave të policisë, ata kanë hedhur nga makina armën, në mes të rrugën nacionale Berat-Poliçan, në lagjen Uznovë.
Në ndjekje të tyre janë vënë forca të shumta policie, të cilët 20 minuta më vonë kanë arrestuar në dalje të qytetit tre shtetasit: Vladimir dhe Xhoni Spahiu dhe Petrit Qypin.
Burimet zyrtare të policisë konfirmojnë se 52-vjeçari Vladimir Spahiu ishte pronari i lavazhit dhe ia kishte dhënë me qera shtatasit Hektor Arrëza,i cili prej disa muajsh nuk i kishte paguar lekët e qirasë.
Ngjarja e sotme ka ardhur pas shumë konflikteve verbale e fizike që Spahiu dhe Arrëza kanë pasur muajin e fundit, për borxhin e papaguar. Plumbat e sotëm kanë pasur shënjestër shtetasin Hektor Arrëza, që në fakt ishte larguar nga lavazhi kur ndodhi ngjarja.
