Boksieri Amerikan, Patrick Day ndërroi jetë të mërkurën, katër ditë pasi pësoi dëmtimin në një ndeshje me Charles Conwell, të shtunën mbrëma në Chikago.
Day, 27 vjeç, pësoi një traumë të fortë në tru natën e ndeshjes, sipas një deklarate të promovuesit të tij, Lou DiBella.
“Ai ishte i rrethuar nga familja e tij, miqtë e afërt dhe anëtarë të skuadrës së tij të boksit, përfshirë mentorin,shokun dhe trajnerin e tij, Joe Higgins.” – tha DiBella në deklaratë.” Në emër të familjes, skuadrës së Patrick, u jemi mirënjohës lutjeve , mbështetjes, dhe dashurisë që keni treguar që nga dëmtimi i tij.” – shtoi ai.
Përpara se të bëhej boksier profesionist, Patrick Day ishte një boksier shumë i dekoruar në nivelet amatore. Kishte fituar 2 tituj kombëtar, turneun e dorezave të arta të New York-ut dhe ishte rezervë në skuadrën olimpike të SHBA-së, të gjitha këto në vitin 2012.
Ai debutoi si profesionist në vitin 2013, dhe fitoi kampionatin WBC kontinental të Amerikave në 2017 dhe kampionatin interkontinental IBF në 2019. Ai ishte i renditur në top 10-en nga WBC dhe IBF.
Rekordi i tij në karrierën e boksit është 17-4-1, ku 6 fitore i kishte arritur me “knock out”.
