Ambasadori i OSBE-së Bernd Borchardt ka reaguar duke kërkuar falje pas gjestit të pahijshëm që bëri ndaj banorëve të “Unazës së re”, në Tiranë, mbrëmjen e djeshme.
“Do të doja t’u kërkoja sinqerisht ndjesë atyre që mund të kem fyer dje. Unë e respektoj të drejtën e shqiptarëve për të protestuar paqësisht”, thuhet në reagimin e ambasadorit Borchardt në Twitter.
Mbrëmjen e djeshme, banorë të “Unazës së Re” protestuan te Drejtoria e Policisë së kryeqytetit, kundër arrestimeve që kreu policia fill pas protestës së tyre në zonën e Unazës. Në një moment, pranë disa banorëve kalon Borchard i shoqëruar nga një zonjë. Nga ajo ç’ka është publikuar në media, dëgjohen protestues të thërrasin “Rama ik”. Borchard i përgjigjet duke ngritur gishtin e mesit.
Gjesti u dënua nga opizita, ndërsa nga qeveria s’ka asnjë reagim.
