Ambasadorja franceze në Tiranë, Christine Vasac, nuk ka preferuar të japë detaje mbi vendimin që pritet të merret nesër në mbledhjen e Këshillit Europian mbi hapjen ose jo të negociatave me Shqipërinë dhe Maqedoninë e Veriut.
Vasac ka preferuar të bëjë rolin e të paditurës, ndërsa u shpreh se vendimi do të merret në unanimitet.
“Nuk dua të fshihem pas gishtit. Ju keni ngritur pyetjet për rrugën europiane.
Ju prisni, ne presim të gjithë bashkë përgjigjen e rëndësishme. Ne nuk dimë çfarë vendimi do jepet. Ky vendim do merret në unaminitet.
Dje, kancelarja Merkel dhe Macron janë takuar në një takim të rëndësishëm”, tha ajo.
Ajo ka bërë një paralelizëm mes vendimit që presin dy vendet e Rajonit me Brexit, por e cilësoi këtë të fundit një proces më të rëndësishëm.
“Është e vërtetë që Shqipëria dhe Maqedonia e Veriut presin një vendim për hapjen e negociatave për në BE.
Por ka çështje, që janë po aq të rëndësishëm siç është çështja e Brexit. Ky është një problem i madh jo vetëm për Francën, por gjithë vendet e Europës dhe na intereson të gjithëve.
Por ka gjithashtu çështje të tjera, të tjera siç është çështja e ngjarjeve në Siri. Është gjithmonë kështu”, tha Christine Vasac.
