Nënkryetarja e LSI-së, Erisa Xhixho, ka dhënë një mesazh të fortë nga Unaza e Re, atje ku prej 1 viti protestohet kundër një projekti që shemb ndërtimet në zonë, për shkak të zgjerimit të rrugës.
Policia ka nisur arrestimet e banorëve që protestojnë, ndërsa Xhixho në mesazhin e saj thekson se rezistenca e banorëve këtu, pavarësisht arrestimeve të paligjshme për të drejtën e tubimit, garantohet me Kushtetutë në konventa evropiane dhe në të gjithë ligjet ndërkombëtare.
“Turp! Nuk e kam me zotërinjtë dhe zonjat që kryejnë detyrën sot, por me drejtuesit e tyre, ministrat e tyre që japin urdhrin për të vendosur popullin përballë popullit. Në vend që këta policë të ishin sot duke ndjekur kriminelët, bandat, trafikantët e drogës, vijnë këtu dhe trysnojnë protestuesit që mbrojnë pronën e tyre”, tha Xhixho, e cila mbrëmjen e djeshme iu bashkua protestës së rradhës te Unaza e Re.
Ajo tha se kjo protestë, është bërë një model frymëzimi për të gjithë Shqipërinë, duke na treguar se duhet të rezistojmë për të drejtat tona dhe të kuptojmë që fuqia jonë është shumë e madhe.
“Me këtë ç’dua të them? Që gjithë kjo protestë, që ju protestoni çdo ditë, me shi, me breshër, me vapë, me halle në familjet tuaja, me shqetësime, dhe pavarësisht gjithçkaje çdo ditë në orën 6 e gjysëm ju jeni këtu për të mbrojtur pronën tuaj, të drejtën tuaj. Ndaj çfarë? Ndaj një projekti totalisht korruptiv, kriminal, ku Prokuroria nuk vepron që të çojë përpara përgjegjësisë të gjithë ata që vjedhin pronën publike edhe taksat e shqiptarëve.
Ndërkohë çfarë ndodh në gjithë këtë puzzle? E gjithë kjo protestë dhe e gjithë frika e pushtetit të sotëm ndaj protestës dhe zërit ndryshe, bën që të mobilizojë të gjithë qeverinë që të ndërtojë një ligj kundër kësaj proteste, një ligj apostafat për të kundërshtuar dhe për t’iu mbyllur gojën, për t’iu frikësuar, për t’iu traumatizuar dhe për të thënë një mesazh shumë të thjeshtë që: Këtu është shteti jonë, është shteti i Edi Ramës, një shtet kriminal që vendos për pronën tonë,për fatin tonë, për jetën tonë dhe për çdo gjë tjetër.
Për sa kohë kemi vendosur të jetojmë në Shqipëri dhe përsa kohë kemi vendosur që të jemi në opozitë me këtë shtet kriminal, që në fakt janë shumë njerëz kundra këtij pushteti që i bëri 1001 të zeza këtij vendi, por pavarësisht se ka të gjitha pushtetet dhe mendon se mund të drejtojë çdo gjë, forca jonë qëndron te rezistenca jonë, për ne dhe për fëmijët tanë për të kuptuar që duhet të mbrojmë të drejtat tona, liritë tona me çdo kosto.
Nëse ulim kokën sot, do ta ulim përjetë dhe do të duhet të largohemi ashtu siç kanë bërë mijëra të rinj”, tha Xhixho
