Partia Demokristiane e Shqipërisë ka reaguar lidhur me qëndrimin e mbajtur nga Kisha Katolike e cila fill pas letrës së ministreve shqiptare drejtuar BE-së, është shprehur kategorikisht kundër përfshirjes së të gjithë shqiptarëve ënë kërkesat e tyre drejtuar një shteti që lejon abortin dhe martesat mes të njëjtit seks.
Partia Demokristiane e Shqipërisë, mbështet opinionin e dhënë nga Kisha Katolike e Shqipërisë, e përfaqësuar nga Presidenti i Konferencës Ipeshkore Imzot George Frendo, në lidhje mbi qëndrimet e bëra publike drejtuar disa anëtarëve të qeverisë shqiptare.
Aborti dhe martesat ndërmjet personave me të njëjtin seks, janë kundër asaj që Demokristianët besojnë në filozofinë e tyre politike.
Imzot George Frendo ka folur në emër të Kishës Katolike në Shqipëri, pra edhe në emrin tonë, si subjekt politik, që besojmë tek vlerat e familjes tradicionale shqiptare.
Ne kemi të drejtën tonë politike të themi qëndrimin tonë mbi këtë çështje, ashtu si i mendojmë dhe i besojmë, pa dashur të imponojmë mendimin, por si një ftesë për reflektim për këdo qytetar që beson tek familja dhe vlerat e saj në shoqëri.
Opinioni publik i Kishës Katolike është një vlerë për të gjithë ne, për Institucionet shqiptare, për orientimin tonë mbi vlerat reale të shoqërisë shqiptare.
Partia Demokristiane e Shqipërisë ka mbrojtur kudo dhe kurdo, në Kuvendin e Shqipërisë, në Këshillat Bashkiak, në çdo Institucion vlerat dhe traditat e familjes shqiptare, duke u shprehur qartazi kundër abortit e martesave të personave me të njëjtin seks.
Ndërtimi i një shoqërie mbi vlerat reale, mbi traditën tonë shekullore, mbi besimin në Zot, mbi orientimin tonë të besimit. Këto janë sfidat tona politike programore, që na udhëheqin, si pjesë e partive Kristiandemokrate Europiane.
Zyra e Shtypit
Partia Demokristiane e Shqipërisë
