Kryeministri Edi Rama gjatë seancë së sotme plenare përdori termin KCCK (Kap cctë kapësh) duke iu drejtuar gjyqtarëve dhe prokurorëve të korruptuar.
“I them parlamentit se ka ardhur koha që të reagojmë me forcë ndaj prokurorëve dhe gjykatësve që nuk e kanë kaluar vetingun e dinë që nuk e kalojnë dhe kanë nxjerrë dhe një togfjalësh mes tyre, KÇK, kap ca të kapësh. Këtë grupim ‘KCK’ ky parlament duhet ta shpalli grup në kërkim, jo metaforikisht, e them në mënyrë të drejtpërdrejte”, tha Rama.
Por për herë të parë termin KÇK e ka përdorur ish-ministri i Drejtësisë, Eduart Halimi.
Sot në Parlamenr, Kryeministri nuk tha asgjë më shumë sesa ka deklaruar Eduart Halimi, ish-ministër në qeverinë Berisha dhe ish-deputet i PD-së, lidhur me reformën në drejtësi.
Pavarësisht se etiketimet kur artikulohen nga Kryeministri marrin tjetër peshë sesa një ish-ministër apo ish-deputet, duket se Rama ka zgjedhur që në rastin konkret të kopjojë tërësisht Eduart Halimin, i cili ka qenë pjesë e komisionit parlamentar për reformën në drejtësi.
Ja çfarë deklaronte Halimi
“Ndërkohë që KLP, KLGJ, KPK, KPA dhe KED janë krijuar dhe po ecin, jemi akoma larg krijimit të GJK, GJL dhe ILD, një tjetër “institucion” po merr formë çdo ditë e më tepër: “KÇK”.
KÇK është sot “organizata” me numrin më të madh të gjyqtarëve e prokurorëve në sistemin e drejtësisë. Ajo ka më shumë anëtarë se KLP, KLGJ, KED, KPK etj. Ajo nuk ka kryetar.
Nuk ka as strukturë të posaçme, as rregullore dhe anëtarët e saj shtrihen te të dyja anët e sistemit të drejtësisë. Sa te Gjyqësori, aq dhe Prokuroria. Ajo po rritet çdo ditë, njëlloj si molekula antimaterie që paraqet Dan Brown tek “Origjina”, në fjalimin mbresëlënës të Edmond Kirshit.
Hyrja në fuqi e paketës për decentralizim e Prokurorisë e rriti fuqishëm ndikimin e antimateries në sistemin e drejtësisë në këtë sektor. KÇK po bëhet organizatë, pa rregulla, duke përfshirë të mirë e të këqij, po kthehet gati në sindromë. KÇK nuk i përket asnjë force politike, ata janë “të pavarur”, i shërbejnë zakonisht kujt merr pushtetin, por dhe gjithë vektorëve pa dallim feje, krahine dhe ideje”, do të shprehej Halimi pak kohë më parë.
“Gjyqtarët dhe prokurorët nuk janë idiotë, naivë apo të keqedukuar. Ata e shohin se si po shkon vetingu dhe nuk kanë shpresë. Ndaj kanë gjetur strehë te KÇK. Në fund të fundit, a nuk iku një gjyqtar që kishte votuar kundër lirimit të kreut të një bande? A nuk iku një gjyqtare që nuk justifikonte 5.000 $ të të shoqit inxhinier në Arabi? A nuk kaluan vetingun gjyqtarë që kishin shumë probleme apo prokurorë që kishin liruar krerë bandash apo kishin ikur nga frika?
Ja pra, këto janë arsyet që ndoshta justifikojnë zgjerimin e kësaj organizate antimaterie të quajtur KÇK. Sepse përveç kësaj, KÇK është e paprekshme dhe nuk e gjen gjë, ndaj dhe ajo po përhapet, sepse mungon ilaçi që të thotë STOP. Nga kjo organizatë nuk vuajnë politikanët, sepse KÇK nuk ka ngjyrë, as parti”, deklaronte Halimi.
