Gazetarja Alice Eisabeth Taylor ka fituar gjyqin ndaj Policisë shqiptare për të qëndruar në Shqipëri. Njoftimi është bërë nga vetë gazetarja përmes një postimi në rrjet.
“Pas 8 muajsh, fitova gjyqin ndaj policisë për të qëndruar në Shqipëri. Falenderoj të gjithë ata që më mbështetën, të dua shumë Shqipëri, Tirana”, shkruan Taylor.
Gazetares nuk iu rinovua leja e qëndrimit nga qeveria shqiptare 8 muaj më parë. Taylor është gazetare britanike dhe shkruan për Balkanista, Exit.al dhe “The Shift”.
Taylor njoftonte muaj më parë në rrjetet sociale se Zyra e Emigracionit kishte anuluar procesin për rinovimin e lejes së qëndrimit të saj.
Vendimi për të mos i rinovuar lejen e qëndrimit gazetares erdhi në një kohë kur mediat pro qeveritare e cilësonin atë si një “spiune ruse”, pas kritikave të saj ndaj qeverisë Rama.
