Pronari i një lokali në Vlorë është arrestuar për “Moskallëzim krimi” dhe “Veprime që pengojnë zbulimin e të vërtetës”, lidhur me plagosjen e një dite më parë.
“G.Ll., 46 vjeç, ka mbërritur i dëmtuar gjatë orëve të mbrëmjes në Spitalin Rajonal të Vlorës”, njoftoi më herët policia. Ai dyshohet të jetë plagosur me mjet prerës në një lokal pranë lagjes “Partizani”, shtuan të njëjtat burime.
Në vijim të veprimeve hetimore, Policia ka identifikuar autorin dhe po punohet për kapjen e tij.
Ndërkohë, ka arrestuar edhe pronarin e lokalit, shtetasin: A.J., 55 vjeç, banues në Vlorë. Nga hetimet e kryera, ka rezultuar se pas ngjarjes së ndodhur, ai nuk ka kallëzuar në organin policor për plagosjen e shtetasit G.Ll. dhe ka mbyllur lokalin duke kryer veprime të tjera me qëllim dëmtimin e provave.
