Rotacionin politik në Kosovë, ardhur nga zgjedhjet e së dielës, 6 tetor, ku fitues doli forca politike e kryesuar nga Albin Kurti, është përshëndetur dhe nga kreu i Partisë Demokratike, Lulzim Basha. Në një postim në Facebook, Basha uron popullin e Kosovës për zgjedhjen dhe mandatin që i dha opozitës për të udhjëhequr vendin drejt ndryshimeve dhe transformimit ekonomik. Basha uron personalisht Albin Kurtin, liderin e Vetëvendosjes dhe Vjosa Osmanin.
Për Bashën, votimet në Kosovë treguan shembull frymëzues me pjesmarrjen masive dhe civilizuese.
Postimi i plotë
Kosova hapi një faqe të re në rrugëtimin e saj si shtet demokratik. Populli i Kosovës votoi për ndryshim duke mandatuar opozitën për të udhëhequr në rrugën e transformimit ekonomik dhe integrimit euro-atlantik. Urimet më të përzemërta LVV dhe LDK, Albin Kurtit dhe Vjosa Osmanit për fitoren.
Përgëzime udhëheqësve të forcave të tjera politike garuese në këto zgjedhje që me qëndrimet e tyre europiane japin garanci për ecjen përpara të Kosovës.
Dje populli i Kosovës dha një shembull frymëzues me pjesmarrjen civile dhe masive në zgjedhje, Policia e Kosovës tregoi profesionalizëm të lartë në ndalimin e menjëhershëm të atyre që cënuan sekretin e votës së lirë duke e fotografuar atë. Kosova i dëshmoi botës se është një demokraci funksionuese dhe se meriton sa më parë vendin dhe rolin e saj në të gjitha institucionet dhe proceset ndëkombëtare. Urime Kosovë!