Janë numëruar mbi 80% të votave dhe Albin Kurti bashkë me mbështetësit e tij i janë drejtuar sheshit “Skënderbeu” në Prishtinë për të festuar fitoren.
Lëvizja vetëvendosje kryeson ndaj Lidhjes Demokratike të Kosovës me 6418 vota, rezultati më i madh i mbështetjes që prej krijimit të saj dhe pritet që në Kosovë të fryjë një erë e re politike.
Vendi futet në një proces që herët e kaluara na kanë mësuar se mund të zgjasë edhe me muaj të tërë, por që ndryshe nga zakonisht, ekziston një mundësi që këtë radhë gjërat të bëhen më shpejt dhe shanset janë që ashtu sikurse është thënë para zgjedhjeve, Kurti dhe Mustafa të krijojnë qeverinë e re.
Gjithçka mbetet për t’u parë, shtuar kësaj faktin se ende ka fletë për t’u numëruar në kutitë e votimit dhe ende është tepër herët për të folur apo bërë fakt të kryer emrin e atij që do të drejtojë Kosovën 4 vitet e ardhshme.
