Dëbohet nga Zvicra pas 40 vitesh. Kjo është historia e një shqiptari nga Kosova, që kishte shkuar në Zvicër kur ishte vetëm 5 vjeç, ndërsa në moshën 45 vjeç, duhet të largohet nga ky shtet.
Aktualisht, baba i dy fëmijëve, ai duhet të kthehet në vendlindje, në Kosovë, shkruan “Aargauer Zeitung”.
Arsyeja për dëbimin e tij është se në rinë e tij, shqiptari nga Kosova ka marrë pjesë në disa vjedhje me vlerë prej rreth 230 mijë frangash dhe i ka shitur në Kosovë sendet e vjedhura në Zvicër. Veç këtyre ai ka qenë i përfshirë në tregtinë me 53 kilogramë drogë të tipit marihuanë.
Gjykata e Qarkut e Badenit e kishte dënuar atë në muajin prill të vitit 2005 me pesë muaj e gjysmë burg, ndërsa në vitin 2014 me katër vite e 9 muaj burg. Gjykata e Lartë (Kantonale) e Aargaut ia kishte ngritur dënimin e fundit për edhe një vit.
Kështu, 45 vjeçari duhet ta mbarojë vuajtjen e dënimit me burg jo më parë se në vitin 2021, përcjell albinfo.ch. Por menjëherë pas kësaj, siç ka vendosur tashmë Zyra për Migracion e Aaraut, ai duhet ta lëshojë edhe Zvicrën.
Kosovari kishte ushtruar të drejtën e ankesës fillimisht në Departamentin Kantonal të Punëve të Brendshme dhe pastaj në Gjykatën Kantonale Administrative. Pasi në të dyjat kishte dështuar, ai kishte ushtruar ankesë edhe në shkallën më të lartë të gjyqësisë së Zvicrës, në Gjykatën Federale, transmeton albinfo.ch.
Gjykata Federale ka vërtetuar vendimet e shkallëve të mëparshme për dëbimin e kosovarit. Gjegjësisht, për heqjen e lejes së qëndrimit të përhershüëm në Zvicër (Viza C).
Këtë vendim gjykata e ka marrë duke pasur parasysh se rreziku për përsëritje është evident dhe për këtë arsye dëbimi është interes publik. Veç kësaj as paralajmërimet dhe as dënimi i parë me burg nuk e kishin ndalur të dënuarin nga kryerja e delikteve tjera.
“Ushtruesi i ankesës nuk i ka shfrytëzuar shanset që i janë ofruar dhe paralajmërimet nuk i ka marrë seriozisht. Si përfundim, ai duhet t`i bartë pasojat përkatëse të gjithë kësaj”, thuhet në vendimin e Gjykatës Federale të Zvicrës.