Tekniku i kombëtares shqiptare, Edi Reja në konferencën për shtyp pas publikimit të listës së lojtarëve të grumbulluar ka sqaruar arsyet pse ka lënë jashtë emrat si Mavraj, Xhaka apo Sadiku.
“Mavraj do të bëjë një ndërhyrje në krah, prandaj edhe mungon për këto dy ndeshje. Sadiku ka kërkuar pushim për arsye familjare. Ndërsa më Taulant Xhakën jam sqaruar, dua t’u jap më shumë hapësirë lojtarëve të rinj”, tha Reja.
I pyetur se pse ka grumbulluar katër portierë, si asnjëherë më parë, Reja ka thënë se kjo i shërben konkurrencës, por shtoi se është ndikuar jo pak edhe nga selektori turk, i cili ka bërë gjithashtu të njëjtën gjë. Ai ka thënë se ende nuk dihet se kush do të jetë portieri i parë i ekipit në ndeshjen kundër Turqisë dhe tre ditë më pas ndaj Moldavisë, përballje të vlefshme për kualifikueset e kampionatit EURO2020.
