Kryeministri Edi Rama tha se është skandaloze që në një shoqëri si e jona të predikohet që përgjegjësia personale të kthehet në kolektive, apo përgjegjësinë e dikujt t’i themi se është përgjegjësi e partisë.
Rama u pyet mbrëmjen e sotme lidhur me kryebashkiakët që rezultojnë se kanë probleme me ligjin e dekriminalizimit, ndërsa tha se letrat që nxori PD janë marrë në rrugë ilegale.
“Këto letra nuk do të merreshin kurrë në rrugë legale, janë marrë në rrugë ilegale. Të thuash sot që nëse dikush gënjen, fajin e ka partia, kjo nuk ka moral.
Na thonë që ne kemi vjedhur vota, por harrojnë se prokurorët e tyre i kishin kasetat aty, nuk i hetuan, i çuan te partia, dhe partia i çoi te Bildi, që të bënte llumin”, tha Rama.
Çështja e kandidatëve të inkriminuar në zgjedhje ka bërë që kryeministri të humbasë qetësinë.
“Nuk janë 3 kandidatë, nga i nxorët tre kandidatë ju? Valdrin Pjetri gënjeu, mban vetë përgjegjësi, pse duhet të mbajë përgjegjësi partia”, tha Rama.
I pyetur nëse Vangjush Dako është dru i shtrembër në konceptin e tij, pasi u përfshi në listën e zezë të DASH, Rama tha se “nuk i di çështjet për të cilat amerikanët vendosën ta përfshijnë në listën e zezë, por unë di që Dako ka bërë më shumë se askush tjetër për Durrësin. Dako nuk është kryebashkiak më, është anëtar i Kryesisë së PS-së, pasi ne jemi familje e madhe”.
Lidhur me Saimir Tahirin, Rama tha se ai është vënë në akuzë nga drejtësia, nëse Dako dhe cilido tjetër duhet të përgjigjet para drejtësisë, dhe nëse kjo ndodh atëherë do të shikoni se unë do të mbaj të njëjtin qëndrim si ndaj Tahirit.
“Ne nuk jemi inkuzicion, SHBA i di vetë pse e mori vendimin ndaj Dakos”, tha Rama.
