Kryeministri Edi Rama u shpreh me nota pesimizmi për çeljen e negociatave të Shqipërisë me Bashkimin Europian. Vendim që merret në mbledhjen e Këshillit të Europës, që zhvillohet më vonë gjatë këtij muaji.
Ashtu siç ka artikuluar muajit e fundit, edhe sot nga foltorja e Kuvendit, kreu i qeverisë u shpreh se, vendimi për çeljen e negociatave nuk varet nga Shqipëria, nëse i ka plotësuar apo jo detyrat e shtëpisë. Për Ramën, varet thelbësisht nga interesi i vetë vendeve të Bashkimit Europian.
Lidhur me kushtet e Gjermanisë tha se i ka vënë “për politikën e vet të brendshme”. Duke u ndaluar te Holanda dhe Franca, vendet skeptike që siç është raportuar, pritet ti thonë “jo” çeljes së negociatave me Shqipërinë, Rama tha se ato do votojnë duke parë interesin e tyre, pa marrë parasysh detyrat e Shqipërisë.
“Dëgjova një që tha nga 3 kushte, Shqipërisë iu bënë nëntë. Nëse bën një krushqi, dhe kur shkon të thonë nga 3 kushte kemi 9, do të thotë se nuk janë gati ata, jo ti”, deklaroi Rama.
“BE s’ka sot problemin e plotësimit të kushteve të Shqipërisë, BE sot ka një debat të brendshëm të imponuar nga dinamika të brendshme dhe të lidhura me periudhë të tërë krize, që ka marrë të përpjetën qysh me shpërthimin e lumit të refugjatëve”, tha Rama këtë të enjte. Megjithatë, një vit më parë, kur kriza e refugjatëve ishte një shqetësim për BE-në së paku po aq aktual sa sot, Rama shprehej ndryshe.
Më 27 qershor 2018, Rama shpërndau “medalje mirënjohje” për katër ambasadorë të Shqipërisë me motivacionin për kontributin e tyre për çështjen e hapjes së negociatave dhe u shpreh se: Shqipëria mori datën e fillimit zyrtar të negociatave për anëtarësim. Çelja e negociatave është përcaktuar pas 12 muajsh.
Dymbëdhjetë muaj kaluan dhe tanimë Shqipëria ndodhet në një pozicion jo të favorshëm, teksa ka nisur numërimi mbrapsht i ditëve të marrjes së vendimit të Këshillit Evropian. Dhe mjafton vetëm një votë kundër, që Shqipëria të mbetet në vendnumëro…
