Një i ri shqiptar dhe një grek janë plagosur në një ngjarje “Far West” të ndodhur mesnatën e së mërkurës në panairin e tregtisë në Artë, raportuan mediat greke. Autorët e plagosjes së dy 27-vjeçarëve raportohet se janë tre të rinj romë.
Të tre dyshohet se filluan të qëllonin jashtë qendrës së ekspozitës, ku plagosën shqiptarin, i cili u transportua në Spitalin Universitar të Janinës. Më pas, ata hynë në sallën e ekspozitës, ku u përfshinë në një episod të ri: Sulmuan fizikisht grekun 27-vjeçar, duke i shkaktuar lëndime, ndërsa njëri nga autorët e qëlloi me armë zjarri, duke e plagosur.
Të mërkurën në mëngjes, të tre romët u arrestuan në Prevezë dhe Louros si pjesë e një operacioni të koordinuar policor nga Departamentet e Sigurisë së Artës dhe Prevezës. Romët 20, 21 dhe 23 vjeç janë akuzuar për vrasje në tentativë në bashkëpunim dhe shkelje të ligjeve për armët.
Gjithashtu, në kërkim janë dhe dy persona të moshës 42 dhe 25 vjeç, të cilët akuzohen për të njëjtat vepra penale.
Policia sekuestroi një pistoletë, fishekë dhe dy shufra druri.
Hetimi paraprak po kryhet nga Departamenti i Policisë së Artës. /BN/
