Nga Boldnews.al
Është familje kryeministrore, të shumëpushtetshëm, të kudogjendur në konçensione me kinezë e sheikë, në sport, ekonomi apo politikë. I madhi është kryeministër, i vogli drejtor sportiv në klubin e formuar në vitin 1946 “Partizani”. Këtë herë Olsi Rama u bë protagonist me justifikim dhune, duke iu referuar incidenteve në prag të ndeshjes Tirana-Partizani në Stadiumin “Selman Stërmasi”.
I ftuar “nderi” në emisionin “Proçesi sportiv” Olsi Rama, justifikoi hiliganët e grupimit të tifozëve. “Dy duar për një kokë janë”-tha ai, teksa shihte disa tifozë të skuadrës që drejton që dhunonin një tifoz të ekipit të Tiranës.
Padyshim një ngjarje e rëndë, ku grupime të vogla të dy tifozerive nisën përplasjen fizike, të dy të dhunshme ku agresiviteti në atë rast nuk matej me ngjyra. Tirana dhe Partizani janë dy ekipe elitë, që kanë bërë historinë në futboll, ku kanë argëtuar mijëra qytetarë në çdo kohë. Edhe brenda një familje mund të gjenden tifozë ku njëri është me Tiranë dhe vëllai me Partizanin.
Sporti mbetet i tillë, adrenalinë, kënaqësi dhe rivalitet në kufijtë e sportivitetit, por fjalët e të madhit Olsi Rama janë edhe më ordinere se vetë trazovaçët e stadiumeve shqiptare. Ai aty është drejtor sportiv, pra përfaqëson sportin, ndonëse në lirshmëri duket si “lac”, pa ngjyrime i kuq apo bardhëeblu. Dhe Olsi më parë se të mbante qëndrime të tilla duhet të kuptojë se të përfaqësosh Partizanin si klub futbolli dhe jo partizanin e luftës.
Të justifikojë dhunën, nën mbrojtjen e pushtetit është edhe më e rëndë se përplasja e disa grupimeve, pasi kjo është mendësi e shtypjes nga më i forti dhe konsiderohet krejt normale aktet e gjakosjeve, plagosjeve, qofshin edhe të lehta apo agresivitetit që vjen nga maja e piramidës drejtuese si shkak dhe shfaqet në stadium si pasojë.
Po duket se e kanë në gen, nuk u bën përshtypje gjaku, dhuna, krimi, apo akoma më rëndë humbjet e jetëve të njerëzve, qofshin ata edhe kriminelë, të cilët drejtësia duhet ti dërgojë në burg dhe jo të vriten rrugëve. Pikërisht duke diskutuar për krimet e tipit mafioz, pak muaj më parë kryeministri Edi Rama deklaroi: “Nuk më vjen aspak keq, hëngshin kokat e tyre”.
Dhe koka sot po hahen, madje shumë, jo sepse i “dëgjuan” fjalën kryeministrit, por kriminaliteti që ka burimin kryesisht në trafikun e drogës, ka ngjashmëri me bandat kriminale të Meksikës, që po hanë kokat e njëri-tjetrit, për ndarje influence. Pak më të përmbajtur o vëllezër Rama…!
